Alte Kapelle Haßbergen Programm Alte Kapelle Aktuelles Alte Kapelle Heimatverein Haßbergen e.V. Hausbands Alte Kapelle Plattdütsch schall leben Traumhochzeit Alte Kapelle Shop Alte Kapelle Links Alte Kapelle Anfahrt Alte Kapelle

 

 

 

 

 

 

 

 

 

 

 

 

 

     
 

Plattdütsch schall leben

 
     
 

Plattdüütschkurse in'n Heimaatvereen Haßbargen

Dag uk, leve Lüe! Mien Naam is Eleonore Meyer. To’e Welt kamen un upwussen bün ik in dat lutje Dörp Lichtenmoor, wo in mien Kinnertiet noch all de, lütt un groot, plattdüütsch snacken. Uk dor hett sik dat siet düsse Tiet ordig ännert. Meist snackt bloots noch de öllern Minschen platt. De Alldaagsspraak is nu uk in us Kuntrei allgemeen dat Hoochdüütsche. Dat is schaad.

As in’n Johr 1990 use lütje „Ole Kapelln” wedder so fein instand brocht woorn wöör, woll de Heimaatvereen uk Plattdüütschkurse anbe’en. To düsse Tiet här ik al anfungen, Gedichte un Vertellsels to schrieven, meist up platt. So hebbt se mi denn fraagt, ob ik nich de Kurse holen woll. Eest wüss ik dat nich so recht antofangen, aver mit Hülpe von dat „Nedderdüütsche Institut“ in Bremen, wo een sik Raatsläge för passliche Böker halen kann, is dat denn ganz goot ingang kamen. Lehrgänge, von de VHS anbaden, hülpen (un helpt) uk füdder. So loopt de Kurse nu al ölben Johr lang, elkeen Winter von Jannewoor bit März 2004 is denn noch en „Plattsnutenkring“ dorto kamen, wo sik de Schölers ut den Haßbarger un de ut den Eestruper Kurs (is jo dichte bi) den Sömmer över eenmal in’n Maand dräpen doot, tohopen snackt un düt un dat up de Been stellt.

Lehrn mit Spaaß, dat liggt mi an’n Harten. Dorüm geiht dat in de Kurse nich so dröge to. Wi möögt uk jümmer geern spelen. „Bingo“ un anner plattdüütsche Spele gifft dat to köpen, en Memory- un en Kortenspeel heff ik sülvst maakt. Düt Kortenspeel, en Quartett, well de Heimaatvereen nu bi en Verlag in Updrag geven, dat uk anner Minschen, de dor Freide an hebbt, dat köpen künnt.

Wat mi an’n meisten freiet is, dat in de lesten Johrn jümmer mehr junge Lüe anlopen kaamt un use schöne, lebennige Spraak lehrn wüllt.

 

Plattdüütsch-Memo „Finn Twee Tohopen“

entwickelt und illustriert von Eleonore Meyer

Herausgeber: Heimatverein Haßbergen e. V.

Leve Lüe,

2010 hebbt wi us´t Plattdüütsch- Quartett ruut gäben un nu, fief Johre wierder, is us´t Plattdüütsch- Memospääl ferdig woorn. Wi freiet us, dat wi dat schafft hebbt un Lütt un Groot wedder wat to´n Spälen in de Hand gäben künnt. Use Heimatautorin Eleonore Meyer hett allens sülmst utdacht un uk de Biller maalt. Ähr Söhn Christian hett de Sake mit de „digitale Technik“ up den Weg brocht, dat dat Spääl druckt weern könn.Välen Dank an beide!

Dat Memo- Spääl schall dorbi helpen, dat use nedderdüütsche Sprake füdderhen bestahn blifft, besünners de Kinner ähr lehrt un dor Spaaß un Freide bi hebbt.

Wi dankt uk de Lüe von Harten, de dän Geldbüdel apen maakt un us ünner de Arms gräpen hebbt!

Dat sünd: De Landschaftsverband Weser-Hunte e.V., de Werner-Ehrich-Stiftung Neenborg un de Ernst-Stewner-Stiftung Neenborg.

Nu wünscht wi Jo alle vääl Spaaß bi´n Spälen!

Heiko Mönch, 1.Vörsitter Heimatvereen Haßbargen

-------------------------------------------------------------------------------------------------

Vör Johr´n heff ik för miene lütjen un groten Plattdüütsch- Schölers een Memo-Spääl maakt, mit Filzstifte, eenfach un bunt. As nu use Heimatvereen dat drucken laten woll, kööm mi dat Spääl doch en bäten to slicht vör. Dorüm heff ik mi hensett´ un dat nochmaal mit Aquarellfarben maalt. Eenige Korten sünd dor uk noch to kamen, wieldat sik de Naams up Platt so besünners schöön anhöört.

Noch to seggen: Sprake un Schrievwiese richt´sik gröttstendeels na dat Platt, dat bi us snackt ward.

So legg ik dat Spääl nu in Jo´e Hänne un wünsch Jo – Groot un Lütt – dor vääl Spaaß un Freide mit!

Eleonore Meyer

 

 

Plattdüütsch-Quartett "Von Arfgen bit Zipollen"

Plattdüütsch-Quartett för lütje un grote Lüe  - maakt von Eleonore Meyer

För us is et eene grote Freide för Lütt un Groot een Plattdüütsch-Quartett ruut to gäben. Af 1. Oktober 2010 is us Plattdüütsch-Quartett nu to köpen.

Wi wünscht alle vääl Spaaß bin Spälen.

 

As ik vör Johr`n dütt Kortenspääl maakt heff, wöör dat blooß för miene lütjen und groten Plattdüütschschöölers dacht, de dor jümmer vääl Spaaß mit hatt hebbt. Dorüm heff ik dor eerst uk gegenan snackt, dat de Heimatvereen dat rutgäben woll. Dat düchte mi nich goot noog to wään, besünners de Schrift geföhl mi nich. Ik schöll dor aber för dän Druck nix an ännern, dat schöll „original“ wään. So legg ik dat nu in Jo`e Hänne as dat is un wünsch Jo vääl Freide bi`n Spälen! Noch to seggen: Sprake un Schrievwiese richt` sik gröttstendeels na dat Platt, dat bi us snackt ward.

Eleonore Meyer


För us is et eene grote Freide för Lütt un Groot een Plattdüütsch-Quartett ruut to gäben. Besünners, weil sick use Heimatautorin Eleonore Meyer dat sülms utdacht un dor de Biller to maalt hett. Wat för een wunnerschönen Infall! Use nedderdüütsche Sprake schall wierder bestahn. Besünners de Kinner schütt ähr lehren un ähr nich vergäten. Wi dankt use Förderer, de dän Geldbüdel apen maakt un us ünner de Arms gräpen hebbt. Von Harten Dank an de Sparkassenstiftung Neenborg, de Ernst-Stewner-Stiftung Neenborg un de Werner-Ehrich-Stiftung Neenborg. Nu wünscht wi Jo alle vääl Spaaß bin Spälen.

Heiko Mönch,
Heimatvereen Haßbargen


So ward späält:

Veer Korten, de to desülwige „Woortfamilje“ höört, sünd een Quartett, wat man afleggen kann.Üm dat tohope to kriegen, mutt de Späler een Mitspäler na de Korten fragen, de em sülms fählt. Wenn de düsse Korten hett, mutt he se hergäben un de Frager draff noch maal fragen. Hett de anner de Korten nich, draff he nu na Korten fragen, de em sülms fählt. Wer toleste de meisten Quartetts afleggen kann, hett gewunnen.

Alle Rechte vorbehalten. Nachdruck verboten

Leider nicht mehr verfügbar - Ausverkauft

.

 
Startseite Alte Kapelle Kontakt Alte Kapelle Impressum Alte Kapelle